ਭਾਰਤੀ ਇਸ਼ਤਿਹਾਰਬਾਜ਼ੀ ਦੇ ਮਹਾਨਾਇਕ ਪੀਯੂਸ਼ ਪਾਂਡੇ ਨਹੀਂ ਰਹੇ, 70 ਸਾਲ ਦੀ ਉਮਰ 'ਚ ਹੋਇਆ ਦਿਹਾਂਤ

ਭਾਰਤੀ ਇਸ਼ਤਿਹਾਰਬਾਜ਼ੀ ਦੀ ਆਵਾਜ਼, ਮੁਸਕਾਨ ਅਤੇ ਸਿਰਜਣਾਤਮਕਤਾ ਦਾ ਪ੍ਰਤੀਕ ਮੰਨੇ ਜਾਣ ਵਾਲੇ ਪੀਯੂਸ਼ ਪਾਂਡੇ ਦਾ 70 ਸਾਲ ਦੀ ਉਮਰ ਵਿੱਚ ਸ਼ੁੱਕਰਵਾਰ ਨੂੰ ਦਿਹਾਂਤ ਹੋ ਗਿਆ ਹੈ। ਉਹ ਸਿਰਫ਼ ਇੱਕ ਮਸ਼ਹੂਰੀ ਮਾਹਿਰ ਨਹੀਂ ਸਨ, ਸਗੋਂ ਉਹ ਕਹਾਣੀਕਾਰ ਸਨ ਜਿਨ੍ਹਾਂ ਨੇ ਭਾਰਤੀ ਇਸ਼ਤਿਹਾਰਬਾਜ਼ੀ ਨੂੰ ਉਸਦੀ ਆਪਣੀ ਭਾਸ਼ਾ ਅਤੇ ਆਤਮਾ ਦਿੱਤੀ। ਉਨ੍ਹਾਂ ਦੀ ਭੈਣ ਈਲਾ ਨੇ ਦੁੱਖ ਪ੍ਰਗਟ ਕਰਦਿਆਂ ਕਿਹਾ ਕਿ ਬਹੁਤ ਦੁਖੀ ਅਤੇ ਟੁੱਟੇ ਦਿਲ ਨਾਲ ਮੈਂ ਇਹ ਸੂਚਿਤ ਕਰ ਰਹੀ ਹਾਂ ਕਿ ਸਾਡੇ ਪਿਆਰੇ ਅਤੇ ਮਹਾਨ ਭਰਾ, ਪੀਯੂਸ਼ ਪਾਂਡੇ ਦਾ ਅੱਜ ਸਵੇਰੇ ਦੇਹਾਂਤ ਹੋ ਗਿਆ ਹੈ।

ਕ੍ਰਿਕਟਰ ਤੋਂ 'ਟੀ-ਟੈਸਟਰ' ਰਾਹੀਂ ਬਣੇ ਐਡ ਗੁਰੂ:

ਜੈਪੁਰ ਵਿੱਚ ਜਨਮੇ ਪੀਯੂਸ਼ ਪਾਂਡੇ ਦਾ ਜੀਵਨ ਸਫ਼ਰ ਬੇਹੱਦ ਦਿਲਚਸਪ ਰਿਹਾ। ਉਹ ਆਪਣੇ ਸ਼ੁਰੂਆਤੀ ਦਿਨਾਂ ਵਿੱਚ ਰਾਜਸਥਾਨ ਦੀ ਰਣਜੀ ਟਰਾਫੀ ਟੀਮ ਦੇ ਕ੍ਰਿਕਟਰ ਰਹੇ ਅਤੇ ਚਾਹ ਦੀ ਗੁਣਵੱਤਾ ਦੀ ਜਾਂਚ (ਟੀ-ਟੈਸਟਰ) ਦਾ ਕੰਮ ਵੀ ਕਰ ਚੁੱਕੇ ਸਨ। ਉਨ੍ਹਾਂ ਮੁਤਾਬਕ, ਇਨ੍ਹਾਂ ਤਜ਼ਰਬਿਆਂ ਨੇ ਉਨ੍ਹਾਂ ਨੂੰ ਟੀਮ ਵਰਕ ਅਤੇ ਚੀਜ਼ਾਂ ਨੂੰ ਬਾਰੀਕੀ ਨਾਲ ਦੇਖਣ ਦੀ ਮਹੱਤਤਾ ਸਿਖਾਈ। 1980 ਦੇ ਦਹਾਕੇ ਵਿੱਚ ਜਦੋਂ ਉਹ Ogilvy India ਨਾਲ ਜੁੜੇ, ਤਾਂ ਉਨ੍ਹਾਂ ਨੇ ਏਜੰਸੀ ਨੂੰ ਏਸ਼ੀਆ ਦੀ ਸਭ ਤੋਂ ਵੱਧ ਸਿਰਜਣਾਤਮਕ ਏਜੰਸੀਆਂ ਵਿੱਚੋਂ ਇੱਕ ਬਣਾ ਦਿੱਤਾ।

ਚਾਰ ਦਹਾਕਿਆਂ ਦਾ ਅਮਿੱਟ ਵਿਰਾਸਤ:

ਚਾਰ ਦਹਾਕਿਆਂ ਤੋਂ ਵੱਧ ਦੇ ਕਰੀਅਰ ਵਿੱਚ, ਉਨ੍ਹਾਂ ਨੇ ਅਜਿਹੇ ਇਸ਼ਤਿਹਾਰ ਬਣਾਏ ਜੋ ਆਮ ਲੋਕਾਂ ਦੀਆਂ ਭਾਵਨਾਵਾਂ ਨਾਲ ਜੁੜੇ। ਏਸ਼ੀਅਨ ਪੇਂਟਸ ਦਾ "ਹਰ ਖੁਸ਼ੀ ਮੇਂ ਰੰਗ ਲਾਏ", ਕੈਡਬਰੀ ਦਾ "ਕੁਛ ਖਾਸ ਹੈ", ਫੈਵੀਕੋਲ ਦਾ ਪ੍ਰਸਿੱਧ "ਐਗ" ਐਡ ਅਤੇ ਹਚ ਦਾ ਪੱਗ (ਕੁੱਤੇ) ਵਾਲਾ ਇਸ਼ਤਿਹਾਰ ਅੱਜ ਵੀ ਲੋਕਾਂ ਦੇ ਜ਼ਿਹਨ ਵਿੱਚ ਜ਼ਿੰਦਾ ਹਨ। ਉਨ੍ਹਾਂ ਦੀ ਅਗਵਾਈ ਹੇਠ Ogilvy ਨੇ ਕਈ ਕੌਮਾਂਤਰੀ ਪੱਧਰ 'ਤੇ ਮਾਨਤਾ ਪ੍ਰਾਪਤ ਮੁਹਿੰਮਾਂ ਤਿਆਰ ਕੀਤੀਆਂ। ਪੀਯੂਸ਼ ਪਾਂਡੇ ਖੁਦ ਭਾਰਤੀ ਸਿਰਜਣਾਤਮਕਤਾ ਦਾ ਵਿਸ਼ਵ ਮੰਚ 'ਤੇ ਪ੍ਰਤੀਕ ਬਣ ਗਏ। ਉਨ੍ਹਾਂ ਨੂੰ ਪਦਮ ਸ਼੍ਰੀ, ਕਈ ਕਾਨਸ ਲਾਇਨਜ਼ (Cannes Lions) ਅਤੇ 2024 ਵਿੱਚ LIA Legend Award ਵਰਗੇ ਸਨਮਾਨਾਂ ਨਾਲ ਨਵਾਜ਼ਿਆ ਗਿਆ ਸੀ।

ਪੀਯੂਸ਼ ਗੋਇਲ ਦਾ ਭਾਵੁਕ ਸ਼ਰਧਾਂਜਲੀ ਪੋਸਟ:

ਕੇਂਦਰੀ ਵਣਜ ਅਤੇ ਉਦਯੋਗ ਮੰਤਰੀ ਪੀਯੂਸ਼ ਗੋਇਲ ਨੇ X 'ਤੇ ਪੋਸਟ ਕਰਦਿਆਂ ਦੁੱਖ ਪ੍ਰਗਟਾਇਆ। ਉਨ੍ਹਾਂ ਲਿਖਿਆ, "ਪਦਮ ਸ਼੍ਰੀ ਪੀਯੂਸ਼ ਪਾਂਡੇ ਦੇ ਦਿਹਾਂਤ ਦੀ ਖ਼ਬਰ ਸੁਣ ਕੇ ਮੈਂ ਆਪਣੇ ਦੁੱਖ ਨੂੰ ਸ਼ਬਦਾਂ ਵਿੱਚ ਬਿਆਨ ਨਹੀਂ ਕਰ ਸਕਦਾ। ਇਸ਼ਤਿਹਾਰਬਾਜ਼ੀ ਦੀ ਦੁਨੀਆ ਵਿੱਚ ਇੱਕ ਵਿਲੱਖਣ ਸ਼ਖਸੀਅਤ, ਉਨ੍ਹਾਂ ਦੀ ਸਿਰਜਣਾਤਮਕ ਪ੍ਰਤਿਭਾ ਨੇ ਕਹਾਣੀ ਸੁਣਾਉਣ ਦੇ ਢੰਗ ਨੂੰ ਬਦਲ ਦਿੱਤਾ। ਮੇਰੇ ਲਈ ਉਹ ਇੱਕ ਅਜਿਹੇ ਮਿੱਤਰ ਸਨ ਜਿਨ੍ਹਾਂ ਦੀ ਸਾਦਗੀ, ਨਿੱਘ ਅਤੇ ਹਾਜ਼ਰ-ਜਵਾਬੀ ਵਿੱਚ ਉਨ੍ਹਾਂ ਦੀ ਪ੍ਰਤਿਭਾ ਝਲਕਦੀ ਸੀ। ਉਨ੍ਹਾਂ ਦਾ ਜਾਣਾ ਇੱਕ ਵੱਡਾ ਖਾਲੀਪਣ ਛੱਡ ਗਿਆ ਹੈ।"

ਸਾਦਗੀ ਅਤੇ ਸਿਰਜਣਾਤਮਕਤਾ ਦਾ ਸੰਤੁਲਨ: ਪੀਯੂਸ਼ ਪਾਂਡੇ ਦੇ ਸਹਿਕਰਮੀ ਉਨ੍ਹਾਂ ਨੂੰ ਇੱਕ ਅਜਿਹੇ ਗੁਰੂ ਵਜੋਂ ਯਾਦ ਕਰਦੇ ਹਨ ਜਿਨ੍ਹਾਂ ਨੇ ਸਾਦਗੀ, ਇਨਸਾਨੀਅਤ ਅਤੇ ਸਿਰਜਣਾਤਮਕਤਾ ਦਾ ਸੰਤੁਲਨ ਬਣਾਈ ਰੱਖਿਆ। ਉਨ੍ਹਾਂ ਦਾ ਮੰਤਰ ਸੀ- “ਸਿਰਫ਼ ਮਾਰਕੀਟ ਨੂੰ ਨਹੀਂ, ਦਿਲ ਸੇ ਬੋਲੋ।” ਉਨ੍ਹਾਂ ਦੀ ਇਹ ਸੋਚ ਅੱਜ ਵੀ ਭਾਰਤੀ ਇਸ਼ਤਿਹਾਰਬਾਜ਼ੀ ਦੀ ਦਿਸ਼ਾ ਨੂੰ ਪ੍ਰਭਾਵਿਤ ਕਰਦੀ ਹੈ। ਉਨ੍ਹਾਂ ਦੇ ਕੰਮ ਨੇ ਇਸ਼ਤਿਹਾਰ ਨੂੰ ਸਿਰਫ਼ ਵਸਤੂਆਂ ਵੇਚਣ ਦਾ ਜ਼ਰੀਆ ਨਹੀਂ, ਸਗੋਂ ਸੰਸਕ੍ਰਿਤੀ ਅਤੇ ਯਾਦਾਂ ਦਾ ਹਿੱਸਾ ਬਣਾ ਦਿੱਤਾ। ਉਨ੍ਹਾਂ ਦੇ ਜਾਣ ਨਾਲ ਇਸ਼ਤਿਹਾਰਬਾਜ਼ੀ ਜਗਤ ਵਿੱਚ ਪਿਆ ਖਾਲੀਪਣ ਜ਼ਰੂਰ ਮਹਿਸੂਸ ਹੋਵੇਗਾ, ਪਰ ਉਨ੍ਹਾਂ ਦੀ ਵਿਰਾਸਤ ਹਮੇਸ਼ਾ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਪ੍ਰੇਰਨਾ ਸਰੋਤ ਰਹੇਗੀ।